Calquera compañía de teatro vive nun marco espacio-temporal do que non se pode desligar. O teatro é vida e para afrontar a vida con humor non hai mellor recurso que a parodia. Berrobambán iniciouse no terreo audiovisual coa produción de sete video-clips nos que a parodia era a mellor arma coa que tratar a actualidade política galega, reaccionando de maneira inmediata a conflictos sociais que marcaron determinados momentos e que, nalgúns casos, aínda seguen vixentes, como a especulación urbanística, o afundimento do Prestige, o Plan Galicia ou as guerras internas do PPdG reflectidas no video-clip “Untos” para o filme colectivo “Hai que botalos”.